1 І вырушыў Нахаш Аманіт, і пачаў ваяваць супраць гораду Ябэш у Гілеадзе. І сказалі Нахашу ўсе жыхары Ябэшу: «Заключы з намі запавет, і мы будзем служыць табе».
2 Нахаш Аманіт адказаў ім: «Я заключу з вамі запавет з гэтаю ўмовай, што кожнаму з вас вылуплю правае вока і выстаўлю вас на пасьмешышча перад абліччам усяго Ізраіля»
3 І адказалі яму старшыні Ябэшу: «Дай нам сем дзён, каб мы маглі разаслаць пасланьнікаў у-ва ўсе межы Ізраіля. І калі ніхто не дапаможа нам, мы выйдзем да цябе».
4 І прыйшлі пасланцы ў Гіву, горад Саўла, і сказалі гэта перад усім народам. І залямантаваў увесь народ, і заплакаў.
5 А Саўл у той час прыгнаў валы з поля і сказаў: «Што здарылася, што народ плача?» І расказалі яму словы людзей з Ябэшу.
6 І зыйшоў на Саўла Дух ГОСПАДА, калі пачуў ён гэтыя весткі, і ахапіў яго гнеў страшэзны.
7 І ўзяў ён пару валоў, пасек іх на часткі і паслаў праз рукі пасланьнікаў у-ва ўсе межы Ізраіля, кажучы: «Хто ня выйдзе і ня пойдзе за Сўлам і Самуэлем, так станецца з яго валамі». І ахапіў страх ГОСПАДАЎ народ, і выйшлі яны ўсе, як адзін чалавек.
8 І ён палічыў іх у Бэзэку, і было трыста тысячаў сыноў Ізраіля, а ваяроў Юды было трыццаць тысячаў.
9 І сказалі яны пасланцам, якія былі прыйшоўшы: «Так скажыце жыхарам Ябэшу ў Гілеадзе: “Заўтра, калі сонца прыгрэе, прыйдзем вас ратаваць”». І вярнуліся пасланцы, і расказалі гэта жыхарам Ябэшу, а тыя вельмі ўсьцешыліся.
10 І сказалі яны Нахашу: «Раніцай мы выйдзем да вас, і вы, як захочаце, так зробіце з намі».
11 Назаўтра Саўл падзяліў народ на тры дружыны, і яны на сьвітаньні ўварваліся ў сярэдзіну табару і забівалі Аманітаў аж да дзённай сьпякоты, а тыя, што засталіся, расьсеяліся так, што не засталося з іх двух разам.
12 І сказаў народ Самуэлю: «Хто гэта казаў: “Ці можа Саўл валадарыць над намі?”? Аддайце нам гэтых людзей, а мы заб’ем іх».
13 Але Cаўл сказаў: «Ніхто ня будзе забіты ў гэты дзень, бо сёньня ГОСПАД уратаваў Ізраіля».
14 А Самуэль сказаў народу: «Хадземце, пойдзем у Гільгал, і там адновім уладу валадара».
15 І рушылі ўсе ў Гільгал, і паставілі валадаром Саўла перад ГОСПАДАМ у Гільгале, і там склалі ахвяры мірныя перад ГОСПАДАМ. І цешыўся там вельмі Саўл і ўсе жыхары Ізраіля.
Першая кніга Самуэля, 11 глава