1 І сказаў ГОСПАД Майсею:
2 «Аб’яві Аарону i скажы яму: “Калі будзеш запальваць лямпы, то на пярэднім баку сьвечніка павінны гарэць сем лямпаў”».
3 Аарон зрабіў гэтак і на пярэднім баку сьвечніка запаліў лямпы, як загадаў ГОСПАД Майсею.
4 Такі вось быў выраб сьвечніка: куты ён быў з золата, ад падставы аж да кветак быў каваны. Быў ён зроблены паводле ўзору, які паказаў ГОСПАД Майсею.
5 І сказаў ГОСПАД Майсею:
6 «Вазьмі лявітаў спаміж сыноў Ізраіля і ачысьці іх.
7 Ачысьці іх так: пакрапі іх вадой ахвяры за грэх, і няхай паголяць яны ўсе валасы на целе, і няхай вымыюць адзеньне сваё, і будуць чыстымі.
8 Потым возьмуць цяля са статку і ахвяру з мукі, запраўленай алеем, а другое цяля са статку ты возьмеш у ахвяру за грэх.
9 Прывядзі лявітаў перад Намёт Спатканьня і зьбяры ўсю супольнасьць Ізраіля.
10 Калі лявіты зьбяруцца перад ГОСПАДАМ, няхай сыны Ізраіля пакладуць на іх рукі свае.
11 Потым Аарон як патрасанае перад ГОСПАДАМ ахвяруе лявітаў ад сыноў Ізраіля, каб былі служыцелямі Ягонымі.
12 А лявіты няхай ускладуць рукі свае на галовы цялят, і ты аднаго з іх складзеш у ахвяру за грэх, а другога — у ахвяру ГОСПАДУ на цэласпаленьне, каб ачысьціць іх.
13 Потым паставіш лявітаў перад Ааронам і сынамі ягонымі і ахвяруеш іх як патрасанае ГОСПАДУ.
14 Выдзелі лявітаў спаміж сыноў Ізраіля, каб былі яны Маімі.
15 А потым няхай прыходзяць і служаць у Намёце Спатканьня, калі ты іх ачысьціш і ахвяруеш іх як ахвяру пасьвячэньня.
16 Бо яны Мне аддадзены спасярод сыноў Ізраіля. Узяў Я іх замест першародных, якія родзяцца ў Ізраіля.
17 Бо Мае ўсе першародныя з сыноў Ізраіля, як з людзей, так і з жывёлы. Ад таго дня, у які Я выгубіў усё першароднае ў зямлі Эгіпецкай, Я іх пасьвяціў Сабе.
18 І ўзяў Я лявітаў замест усіх першародных спаміж сыноў Ізраіля,
19 і даю іх Аарону і сынам ягоным спаміж сыноў Ізраіля, каб служылі Мне за ўсяго Ізраіля ў Намёце Спатканьня, каб перамаляць ГОСПАДА за іх, каб усьцерагчы ад кары народ, калі б асьмеліўся наблізіцца да Сялібы».
20 Дык Майсей і Аарон і ўся супольнасьць сыноў Ізраіля зрабілі з лявітамі гэтак; як загадаў ГОСПАД Майсею, так і зрабілі з імі сыны Ізраіля.
21 Вось жа ачысьціліся лявіты і памылі адзеньне сваё, а Аарон, патрасаючы, ахвяраваў іх ГОСПАДУ і ачысьціў іх, каб былі ачышчаныя.
22 Пасьля спаўнялі яны абавязкі свае ў Намёце Спатканьня ў прысутнасьці Аарона і сыноў ягоных. Як адносна лявітаў загадаў ГОСПАД Майсею, так вось і сталася.
23 І сказаў ГОСПАД Майсею:
24 «Такі вось закон адносна лявітаў: ад дваццаці пяці гадоў і вышэй няхай прыходзяць яны і служаць ў Намёце Спатканьня;
25 а калі скончаць пяцідзясяты год жыцьця, няхай ня служаць,
26 а будуць толькі дапамагаць братам сваім у Намёце Спатканьня, але абавязкаў ужо сваіх спаўняць ня будуць. Так зробіш з лявітамі адносна службы іхняй».
Кніга Лікі, 8 глава