1 І сказаў тады ГОСПАД Аарону: «Ты і сыны твае, і дом бацькі твайго з табой будзеце адказныя за праступкі, дапушчаныя ў Сялібе. Ты і сыны твае будзеце адказныя за грахі сьвятарства вашага.
2 Вазьмі сабе таксама братоў тваіх, пакаленьне Левія, племя бацькі твайго, няхай будуць яны пры табе і дапамагаюць табе; а ты і сыны твае з табою будзеце пры Намёце Спатканьня.
3 Няхай рупяцца яны пра тое, што патрэбнае для цябе і для Сялібы. Але да сьвятых рэчаў і да ахвярнiка ня могуць яны прыступацца, каб не памерлі і яны, і вы разам з імі.
4 Няхай будуць яны пры табе і няхай рупяцца пра ўсё адносна Намёту Спатканьня, пра ўсю службу ў Сялібе. Але ніводзін чужынец ня можа набліжацца да вас.
5 Вы рупцеся пра абслугу Сялібы ды пра абслугу ахвярнiка, каб не ўзгарэўся зноў гнеў на сыноў Ізраіля.
6 Вось жа ўзяў Я братоў вашых, лявітаў, спасярод сыноў Ізраіля і даў іх як дар ГОСПАДУ, каб спаўнялі службу ў Намёце Спатканьня.
7 І ты і сыны твае захоўвайце сьвятарства вашае і ўсё, што належыць да абслугі ахвярнiка і месца за заслонай. Я даю вам дар службы сьвятарства, а хто чужы прыступіцца, пакараны будзе сьмерцю».
8 І сказаў ГОСПАД Аарону: «Я даручаю табе нагляд за дарамі Маімі. Усе дары, якія пасьвячаюцца сынамі Ізраіля, Я перадаю табе і сынам тваім за служэньне сьвятарскае як закон вечны.
9 З дароў найсьвяцейшых, за выключэньнем таго, што будзе спалена, возьмеш сабе кожны дар і ахвяру за грэх, ахвяру хлебную і ахвяру аднагараджэньня, якія Мне прыносяць; як рэчы найсьвяцейшыя будуць яны належаць табе і сынам тваім.
10 У месцы найсьвяцейшым будзеш іх есьці; толькі мужчыны могуць есьці гэта, бо гэта сьвятыня для цябе.
11 Дары ахвярныя, патрасаныя парад ГОСПАДАМ, якія складаюць сыны Ізраіля, Я даю табе, і сынам тваім, і дочкам тваім як закон вечны; кожны чысты ў доме тваім няхай спажывае іх.
12 Табе Я даю ўсё, што найлепшае з алею, усё, што найлепшае з віна і збожжа, якое сыны Ізраіля прыносяць ГОСПАДУ як першыя плады.
13 І пяршыны, якія яны прыносяць ГОСПАДУ з усёй іхняй зямлі, належаць табе. Кожны, хто чысты спаміж сям’і тваёй, можа іх спажываць.
14 Усё, што заклятае у Ізраілі, тваім будзе.
15 Усе першародныя ўлоньня маткі, якія прыносяцца ў ахвяру ГОСПАДУ, ці з людзей, ці з жывёлы, тваімі будуць. Што да людзей першародных і кожнай жывёлы, якая нячыстая, іх трэба выкупіць.
16 Выкуп бярэцца праз месяц пасьля нараджэньня ў пяць сыкляў срэбра па вазе сьвятыні; сыкль мае дваццаць гераў.
17 Першародных кароваў, авечак і козаў ня будзеш выкупляць, бо яны пасьвячаны ГОСПАДУ. Толькі кроў іхнюю выльеш на ахвярнiк, а тлушч іхні спаліш у агні на мілы пах ГОСПАДУ.
18 Мяса іхняе табе належыць, грудзіна патрасаная і правая лапатка будуць тваімі.
19 Усе дары сьвятыя, якія ахвяроўваюць сыны Ізраіля ГОСПАДУ, Я даю табе, і сынам тваім, і дочкам тваім як закон вечны. Гэта вечны закон солі перад ГОСПАДАМ для цябе і сыноў тваіх».
20 І сказаў ГОСПАД Аарону: «У зямлі іхняй ня будзеш мець ніякай уласнасьці i ня будзеш мець між імі часткі зямлі. Я — частка твая і спадчына твая між сынамі Ізраіля.
21 Вось жа сынам Левія Я даю як спадчыну ўсе дзесяціны, складаныя сынамі Ізраіля, за служэньне, якое яны выконваюць для Мяне ў Намёце Спатканьня.
22 А сыны Ізраіля не павінны прыступаць да Намёту Спатканьня, каб не дапусьціліся грэху ды не памерлі.
23 Адны толькі лявіты могуць выконваць служэньне ў Намёце Спатканьня і несьці на сабе грэх іхні. Гэта закон вечны для нашчадкаў вашых. Лявіты ня будуць мець спадчыны між сынамі Ізраіля,
24 бо Я даў лявітам у спадчыну дзесяціны, якія сыны Ізраіля ахвяроўваюць ГОСПАДУ. Дзеля таго сказаў Я ім: “Між сыноў Ізраіля ня будзеце вы мець спадчыны”».
25 Пасьля гаварыў ГОСПАД Майсею:
26 «Аб’яві лявітам і скажы ім: “Калі вы атрымаеце дзесяціны ад сыноў Ізраіля, якія Я даў вам у спадчыну, то дзясятую частку маеце адкласьці ГОСПАДУ.
27 Гэта будзе вам залічана як ахвяра ад збожжа з току або ад таго, што напаўняе тоўчню.
28 І вы таксама павінны складаць ГОСПАДУ ахвяры з дзесяцінаў, якія атрымоўваеце ад сыноў Ізраіля; прынясіце іх ГОСПАДУ і дайце сьвятару Аарону.
29 З усяго, што атрымліваеце з дзесяцін, выдзеліце дары ГОСПАДУ, і няхай будуць яны найлепшыя і адборныя”.
30 І скажы ім: “Калі вы зложыце ў ахвяру з дзесяцінаў што адборнае і найлепшае, то гэта будзе вам залічана як ахвяра з току і з тоўчні.
31 Можаце гэта есьці на кожным месцы разам з усімі, хто належыць да сем’яў вашых. Бо гэта плата за службу вашую ў Намёце Спатканьня.
32 Калі адберыцё тое, што найлепшае, не саграшыце, і не зьняважыце сьвятых дароў Ізраіля, і не памрыцё”».
Кніга Лікі, 18 глава