1 Такія вось прыказаньні і законы, якія вы павінны спаўняць у зямлі, якую ГОСПАД, Бог бацькоў вашых, дасьць вам, каб валодалі ёю ў-ва ўсе дні жыцьця вашага на зямлі.
2 Зьнішчыце ўсе месцы, дзе народы, якія вы пазбавіце спадчыны, служылі багам сваім на горах, на ўзгорках і пад кожным зялёным дрэвам.
3 Разваліце ахвярнiкi іхнія, пабіце слупы іхнія, агнём спаліце гаі іхнія, і паразьбівайце ідалаў іхніх, і сатрыце імёны іхнія з гэтага месца.
4 Не рабіце так ГОСПАДУ, Богу вашаму,
5 але прыходзьце на месца, якое Сам ГОСПАД, Бог ваш, выбярэ з усіх пакаленьняў вашых, каб там памясьціць імя Сваё і ў ім жыць,
6 і ў гэтым месцы складайце цэласпаленьні, ахвяры крывавыя, дзесяціны i дары рук вашых, і тое, што шлюбавалі, і дабраахвотныя ахвяры вашыя, і першародных валоў і авечак.
7 Там, перад абліччам ГОСПАДА, Бога вашага, ешце вы і сем’і вашыя і весяліцеся з усяго, што зрабілі рукі вашыя, у чым дабраславіў вам ГОСПАД, Бог ваш.
8 Ня будзеце там рабіць таго, што мы тут робім сёньня, кожны, што яму здаецца добрым,
9 бо вы яшчэ не прыйшлі ў месца супакою і да ўласнасьці, якую дае вам ГОСПАД, Бог ваш.
10 Калі вы пяройдзеце Ярдан і абжывіцёся ў зямлі, якую дае вам ГОСПАД, Бог ваш, каб жылі ў супакоі ад ўсіх ворагаў навокал ды жылі без ніякага страху,
11 тады ў месцы, якое выбраў ГОСПАД, Бог ваш, каб у ім было імя Ягонае, туды прыносьце ўсё, што я вам сёньня загадваю: цэласпаленьні, ахвяры крывавыя, дзесяціны, дары рук вашых і тое, што шлюбавалі вы для ГОСПАДА.
12 Там перад ГОСПАДАМ, Богам вашым, цешцеся вы, і сыны вашыя, і дочкі вашыя, слугі і служкі вашыя, а таксама лявіт, які у брамах вашых, бо ня мае ён часткі, ані спадчыны паміж вамі.
13 Сьцеражыцеся, каб не складаць ахвяраў сваіх цэлапальных на кожным месцы, якое ўбачыш,
14 але на тое месца, якое выбярэ ГОСПАД у адным з пакаленьняў тваіх, занясеш усё, што я табе загадваю.
15 Аднак калі захочаш есьці, забі жывёлу і еш мяса яе ў кожным з гарадоў тваіх па дабраславенству ГОСПАДА, Бога твайго; чысты і нячысты можа есьці яго, як сарну і аленя,
16 за выняткам крыві, якую выльеш на зямлю, як ваду.
17 Ня можаш есьці ў гарадах тваіх дзесяціны са збожжа твайго, віна і алівы тваёй, першародных жывёлаў у статку, ані ўсяго таго, што шлюбаваў ГОСПАДУ, Богу твайму, ані ахвяраў дабраахвотных, ані дароў з рукі тваёй.
18 Але будзеш есьці іх перад абліччам ГОСПАДА, Бога твайго, ў месцы, якое выбярэ ГОСПАД, Бог твой, ты і сын твой, і дачка твая, слуга і служка твая, таксама лявіт, якi ў брамах тваіх; і будзеш цешыцца перад ГОСПАДАМ, Богам тваім, з усяго, да чаго прылажыў руку тваю.
19 Уважай, каб не пакідаў ты лявіта ўвесь час, калі будзеш жыць у зямлі тваёй.
20 Калі пашырыць ГОСПАД, Бог твой, межы твае, як сказаў Ён табе, і ты захочаш есьці мяса, якога жадае душа твая, тады еш мяса паводле прагненьня душы тваёй.
21 Калі б месца, якое выбраў ГОСПАД, Бог твой, каб там памясьціць імя Сваё, будзе далёка ад цябе, то забі з жывёлы і статку, якія даў табе ГОСПАД, як загадаў я табе, і спажывай у брамах тваіх паводле жаданьня душы тваёй.
22 Як ясьцё сарну і аленя, так іх еш; як чысты, так і нячысты нароўні могуць гэта спажываць.
23 Адно толькі высьцерагайся спажываць крыві; бо кроў ёсьць душа іхняя, і таму не павінен ты есьці душу разам з мясам.
24 Не спажывай яе, але вылі на зямлю, як ваду.
25 Не спажывай яе, каб добра табе было і дзецям тваім пасьля цябе, калі будзеш рабіць тое, што падабаецца ГОСПАДУ.
26 Але тое, што пасьвяціў ты і шлюбаваў ГОСПАДу, вазьмі і занясі на тое месца, якое выбраў ГОСПАД, каб клікалі там імя Ягонае,
27 і ахвяруеш цэласпаленьні твае, мяса і кроў, на ахвярнiку ГОСПАДА, Бога твайго; кроў ахвяраў выльеш на ахвярнiку, а мяса сам зьясі.
28 Уважліва слухай і выконвай ўсё, што я загадваю табе, каб добра табе было і дзецям тваім пасьля цябе на вякі, калі споўніш, што добрае і што мілае перад абліччам ГОСПАДА, Бога твайго.
29 Калі ГОСПАД, Бог твой, выганіць перад табою народы, да якіх ты ідзеш, каб завалодаць імі, і ты завалодаеш імі, і абжывешся на зямлі іхняй,
30 сьцеражыся, каб не пайсьці ў іх сьляды, калі яны будуць выгубленыя, і не шукаць багоў іхніх, кажучы: “Як служылі гэтыя народы багам сваім, так і я буду ім служыць”.
31 Не рабі гэтак ГОСПАДУ, Богу твайму, бо ўсё, чым брыдзіцца ГОСПАД і што ненавідзіць, яны багам сваім рабілі, нават сыноў сваіх і дачок у агні палілі для багоў сваіх.
Кніга Другазаконьне, 12 глава