1 У той час не было валадара ў Ізраілі, а пакаленьне Дана шукала сабе зямлі на пасяленьне, бо аж да гэтага дня не была выдзелена ім зямля сярод пакаленьняў Ізраіля.
2 І выправілі сыны Дана з межаў пакаленьня свайго пяць чалавек, людзей ваенных з Цоры і Эштаолу, каб выведалі зямлю, і пільна разгледзелі яе. І сказалі ім: «Ідзіце і выведайце гэтую зямлю». Дык прыйшлі яны аж на гару Эфраіма, аж да дому Міхі, і там заначавалі.
3 Калі яны былі блізка дому Міхі, пазналі яны голас юнака лявіта і, зыйшоўшы там з дарогі, спыталіся ў яго: «Хто цябе сюды прывёў? Што ты тут робіш? З якой прычыны захацеў ты сюды прыйсьці?»
4 Ён адказаў ім: «Гэта і гэта зрабіў для мяне Міха, і за плату наняў мяне, каб я быў яму сьвятаром».
5 І прасілі яны яго: «Парайся з Богам, каб мы маглі ведаць, ці дарога, якую мы выбралі, будзе мець посьпех».
6 Ён адказаў ім: «Ідзіце ў супакоі. ГОСПАДУ даспадобы дарога вашая, і падарожжа, у якое вы выбраліся».
7 І пайшлі тыя пяць чалавек, і прыбылі ў Ляіш, і ўбачылі народ, які жыве без ніякага страху па звычаю Сідонцаў, бясьпечны і спакойны, бо не было нікога, хто нападаў бы на зямлю іхнюю. І Сідонцы былі ад іх далёка, і ня мелі яны ніякіх адносінаў з Асурам.
8 І вярнуліся яны да братоў сваіх у Цору і Эштаол, а тыя спыталіся ў іх: «Што вы скажаце?»
9 Яны адказалі: «Устаньце і пойдзем супраць іх. Бо мы бачылі зямлю вельмі багатую і ўраджайную. Чаго вы сядзіце? Не марудзьце, пойдзем і здабудзем яе.
10 Пойдзем да людзей бясьпечных у зямлю абшырную. Дасьць нам Бог месца, дзе няма ніякай нястачы ні ў чым, што ёсьць на зямлі».
11 І вырушылі адтуль з пакаленьня Дана з Цоры і Эштаолу, шэсьцьсот чалавек, узброеных да бою.
12 Яны пайшлі і расклаліся табарам у Кірыят-Ярыме ў Юдэі. І тое месца з таго часу ўзяло імя Табар Дана, і знаходзіцца яно на захад ад Кірыят-Ярыму.
13 Адсюль пайшлі яны на гару Эфраіма, і прыйшлі ў дом Міхі.
14 І пяць чалавек, якія раней пасланыя былі для выведкі зямлі Ляіш, сказалі братам сваім: «Ці ведаеце, што ў дамах гэтых ёсьць эфод і тэрафімы, рэзьбены балван і балван, выліты з мэталю? Ведаеце, што рабіць, дык рабіце».
15 І зьвярнулі туды, і ўвайшлі ў дом юнака левіта, у дом Міхі, і прывіталі яго словамі мірнымі.
16 А шэсьцьсот чалавек, якія былі ўзброеныя, стаялі перад брамай, былі гэта сыны Дана.
17 І тыя пяцёра, што былі раней пасланыя выведаць зямлю, узялі рэзьбеную статую, эфод, тэрафіма і літога балвана. Сьвятар жа стаяў перад брамай, і побач сталі шэсьцьсот чалавек узброеных.
18 І вось яны ўвайшлі ў дом Міхі, і ўзялі рэзьбеную статую, эфод, тэрафіма і літога балвана. І сказаў ім сьвятар: «Што вы робіце?»
19 Яны яму адказалі: «Маўчы! Палажы палец на вусны свае і хадзі з намі, каб мелі мы ў табе і бацьку, і сьвятара. Як табе лепей, быць сьвятаром у доме аднаго чалавека, ці быць сьвятаром усяго пакаленьня і ўсяго Ізраіля?»
20 І ўзрадаваўся сьвятар, і ўзяў эфод, тэрафімаў, а таксама рэзьбенага балвана, і пайшоў з грамадой гэтай.
21 І яны павярнуліся, і пайшлі далей, а перад сабой пусьцілі ісьці дзяцей, жывёлу і ўсю маёмасьць сваю.
22 Калі яны былі ўжо далёка ад дому Міхі, мужчыны, якія жылі ў ваколіцах каля Міхі, сабраліся і дагналі сыноў Дана,
23 і ззаду за імі паднялі крык. Тыя павярнуліся і сказалі да Міхі: «Што табе? Чаго крычыцё?»
24 Ён адказаў: «Бога майго, якога я зрабіў сабе, вы забралі, і сьвятара, і ўсё, што маю, і яшчэ кажаце: “Што табе?”»
25 І сказалі яму сыны Дана: «Маўчы, каб больш ня чулі мы голасу твайго за сабою, каб людзі нашыя са злосьці ня кінуліся на цябе, бо тады і ты сам, і ўвесь дом твой прападзе».
26 І сыны Дана пайшлі дарогаю сваёй, а Міха, бачачы, што яны мацнейшыя за яго, вярнуўся ў дом свой.
27 А тыя шэсьцьсот чалавек узялі тое, што зрабіў Міха, і сьвятара ягонага, і прыйшлі ў Ляіш, да народу спакойнага і бясьпечнага, і пабілі яго мячом, а горад спалілі агнём.
28 І ніхто ня мог ім дапамагчы, бо яны далёка жылі ад Сідону, і ня мелі ніякіх адносінаў з Асурам. Гэты горад быў у лагчыне ў Бэт-Рэхобе, і яны адбудавалі яго нанова, і жылі ў ім.
29 І назвалі горад гэты Дан, ад імя Дана, бацькі свайго, народжанага Ізраілем. Раней гэты горад называўся Ляіш.
30 Сыны Дана паставілі сабе рэзьбенага балвана, а Ёнатан, сын Гершома, сына Майсея, а таксама сыны ягоныя былі сьвятарамі ў пакаленьні Дана аж да дня перасяленьня жыхароў гэтае зямлі.
31 І балван, якога зрабіў Міха, заставаўся ў іх увесь час, калі дом Божы быў у Шыло.
Кніга Судзьдзяў, 18 глава