1 Няхай не трывожыцца ваша сэрца: веруйце ў Бога і ў Мяне веруйце.
2 У доме Майго Бацькі жылля шмат; а калі б не, хіба Я сказаў бы вам: іду падрыхтаваць месца вам!
3 І калі пайду і падрыхтую месца вам, зноў прыйду і вазьму вас да Сябе, каб, дзе Я, і вы былі.
4 Акуды [Я] іду, дарогу ведаеце».
5 Кажа Яму Фама: «Госпадзе, мы не ведаем, куды Ты ідзеш; як жа можам мы ведаць дарогу?»
6 Кажа яму Ісус: «Я — дарога, і праўда, і жыццё; ніхто не прыходзіць да Бацькі, як не праз Мяне.
7 Калі б вы ведалі Мяне, то і Майго Бацьку ведалі б. І з гэтага часу вы ведаеце Яго і бачылі Яго».
8 Кажа Яму Філіп: «Госпадзе, пакажы нам Бацьку, і гэтага нам даволі».
9 Кажа яму Ісус: «Гэтулькі часу Я з вамі, і ты не ведаеш Мяне, Філіпе? Хто Мяне ўбачыў, убачыў Бацьку. Як жа ты кажаш: «Пакажы нам Бацьку?»
10 Ці не веруеш ты, што Я ў Бацьку, і Бацька ўва Мне! Словы, што Я кажу вам, Я не ад Сябе кажу: Бацька, што ўва мне, застаецца, робіць Свае справы.
11 Паверце Мне, што Я ў Бацьку, і Бацька ўва Мне. Калі ж не, то паверце за самі ўчынкі.
12 Папраўдзе, папраўдзе кажу вам: хто веруе ў Мяне, той будзе рабіць учынкі, якія Я раблю, і большыя за гэтыя зробіць, бо Я іду да Бацькі;
13 І пра што ні папросіце ў імя Маё, Я зраблю, каб быў праслаўлены Бацька ў Сыне.
14 Калі што папросіце Мяне ў імя Маё, Я зраблю.
15 Калі любіце Мяне, Мае запаведзі выконвайце.
16 І Я ўмалю Бацьку, і другога Суцяшальніка дасць Ён вам, каб быў з вамі навекі,
17 Духа праўды, Якога свет не можа прыняць, бо не бачыць Яго і не ведае; а вы ведаеце Яго, бо Ён з вамі застаецца і ў Вас будзе.
18 Не пакіну вас сіротамі, прыйду да вас.
19 Яшчэ нядоўга, і ўжо свет Мяне не ўбачыць; але вы ўбачыце Мяне, бо Я жыву, і вы жыць будзеце.
20 У той дзень вы ўведаеце, што Я ў Сваім Бацьку, і вы ўва Мне і Я ў вас.
21 Хто мае запаведзі Мае і іх выконвае, той любіць Мяне. А таго, хто любіць Мяне, палюбіць Мой Бацька, і Я палюблю яго і адкрыюся яму Сам».
22 Кажа яму Юда, не Іскарыёт: «Госпадзе, што гэта, што Ты хочаш адкрыць Сябе нам, а не свету?»
23 Адказаў Ісус і сказаў яму: «Калі хто любіць Мяне, Маё слова выканае, і Мой Бацька палюбіць яго, і да яго Мы прыйдзем і жыллё ў яго ўсталюем.
24 Хто не любіць Мяне, той Маіх слоў не выконвае; а слова, якое чуеце, не Маё, а Бацькі, што паслаў Мяне».
25 Гэта Я сказаў вам, будучы з вамі.
26 Суцяшальнік жа, Святы Дух, Якога пашле Бацька ў Маё імя, навучыць вас усяму і прыгадае вам усё, што сказаў вам [Я].
27 Супакой пакідаю вам, Мой супакой даю вам: не так, як свет дае, Я даю вам. Няхай не трывожыцца ваша сэрца і не баіцца.
28 Вы чулі, што Я сказаў вам: «Адыходжу і прыйду да вас». Калі б вы любілі Мяне, вы ўзрадаваліся б, што Я іду да Бацькі, бо Бацька большы за мяне.
29 І Я сказаў вам цяпер, раней, чым збылося, каб вы ўверавалі, калі збудзецца.
30 Я ўжо не буду шмат гаварыць з вамі, бо ідзе князь свету; і ўва Мне не мае нічога,
31 Але каб свет уведаў, што Я люблю Бацьку і, як Бацька запаведаў Мне, так раблю. Уставайце, хадзем адсюль.